ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (DRDO)ના એક વરિષ્ઠ અધિકારીની શુક્રવારે પાકિસ્તાની જાસૂસ સાથે ભારતના સંરક્ષણ ક્ષેત્ર સાથે સંબંધિત ગુપ્ત માહિતી શેર કરવાના આરોપમાં ધરપકડ કરવામાં આવી હતી. આ અંગે માહિતી આપતા ઓડિશા પોલીસે જણાવ્યું કે 57 વર્ષીય અધિકારી ઓડિશાના બાલાસોર જિલ્લાના ચાંદીપુર ખાતે DRDOની ઈન્ટિગ્રેટેડ ટેસ્ટ રેન્જ (ITR)માં તૈનાત છે. જણાવી દઈએ કે ચાંદીપુરમાં 2 ટેસ્ટ રેન્જ છે, જેમાં ભારત પોતાની મિસાઈલ, રોકેટ અને એર એટેક હથિયારોની કાર્યક્ષમતાનું પરીક્ષણ કરે છે.
પોલીસ મહાનિરીક્ષક (ઈસ્ટ રેન્જ) હિમાંશુ કુમાર લાલે કહ્યું, “ચાંદીપુરની ITR ટેસ્ટિંગ રેન્જના એક વરિષ્ઠ કર્મચારીની ધરપકડ કરવામાં આવી છે. તેણે મિસાઈલ પરીક્ષણો સંબંધિત કેટલીક સંવેદનશીલ માહિતી વિદેશી એજન્ટને મોકલવામાં સફળ રહી છે.તેમણે કહ્યું કે ચાંદીપુર પોલીસ સ્ટેશનમાં આપેલી ફરિયાદના આધારે આરોપી અધિકારીની ધરપકડ કરવામાં આવી છે. બાલાસોરના પોલીસ અધિક્ષક સાગરિકા નાથે કહ્યું કે આરોપી ડીઆરડીઓ અધિકારીએ જે માહિતી શેર કરી છે તે પૂછપરછ બાદ જ વિગતવાર જાણી શકાશે.
પોલીસે જણાવ્યું કે, આરોપીઓ વિરુદ્ધ આઈપીસીની કલમ 120A અને 120B (ગુનાહિત કાવતરું) ઉપરાંત ઓફિશિયલ સિક્રેટ એક્ટ હેઠળ કેસ નોંધવામાં આવ્યો છે. તેણે કહ્યું કે આરોપી અધિકારીએ કથિત રીતે “જાતીય સંતોષ અને નાણાકીય લાભ” માટે પાકિસ્તાની જાસૂસ સાથે સંવેદનશીલ સંરક્ષણ માહિતી શેર કરી. પોલીસે જણાવ્યું કે અધિકારીના ફોનમાંથી “વોટ્સએપ ચેટ અને અશ્લીલ તસવીરો અને વીડિયો” મળી આવ્યા હતા, જેને જપ્ત કરવામાં આવ્યો હતો.
