ઈન્ડિયન સ્પેસ રિસર્ચ ઓર્ગેનાઈઝેશન (ISRO) એ તેના મૂન મિશન ચંદ્રયાન-3 અંતર્ગત મોટી સફળતા હાંસલ કરી છે. ISRO અનુસાર, ચંદ્રયાન-3 મિશન માટે લોન્ચ વ્હીકલના CE-20 ક્રાયોજેનિક એન્જિનનું સફળતાપૂર્વક પરીક્ષણ કરવામાં આવ્યું હતું.
24 ફેબ્રુઆરીના રોજ તમિલનાડુના મહેન્દ્રગિરી ખાતે ISRO પ્રોપલ્શન કોમ્પ્લેક્સની હાઈ એલ્ટિટ્યુડ ટેસ્ટ ફેસિલિટી ખાતે 25 સેકન્ડની આયોજિત અવધિ માટે પરીક્ષણ કરવામાં આવ્યું હતું, ISRO અધિકારીઓએ જણાવ્યું હતું. સ્પેસ એજન્સી દ્વારા સોમવારે જારી કરવામાં આવેલા નિવેદનમાં કહેવામાં આવ્યું છે કે પરીક્ષણ દરમિયાન તમામ માપદંડો સંતોષકારક જણાયા હતા. સંપૂર્ણ સંકલિત ઉડાન માટે ક્રાયોજેનિક એન્જિન પ્રોપેલન્ટ ટાંકી, સ્ટેજ સ્ટ્રક્ચર અને સંકળાયેલ પ્રવાહી રેખાઓ સાથે સંકલિત કરવામાં આવશે.
આ પહેલા ઈસરોએ ચંદ્રયાન-3ના લેન્ડરનું સફળ પરીક્ષણ કર્યું હતું. ISRO એ જણાવ્યું હતું કે ઉપગ્રહ મિશન માટે EMI/EMC પરીક્ષણ અવકાશ વાતાવરણમાં ઉપગ્રહ સિસ્ટમની કાર્યક્ષમતા અને અપેક્ષિત ઇલેક્ટ્રોમેગ્નેટિક સ્તરો સાથે તેની સુસંગતતાની ખાતરી કરવા માટે હાથ ધરવામાં આવે છે. સ્પેસ એજન્સીએ કહ્યું હતું કે, આ પરિક્ષણ સેટેલાઇટના નિર્માણની દિશામાં એક મુખ્ય સીમાચિહ્નરૂપ છે.
ચંદ્રયાન-3 જૂનમાં લોન્ચ થશે
ચંદ્રયાન-3 એ ભારતનું ત્રીજું ચંદ્ર મિશન છે. તેનો ઉદ્દેશ્ય રોવરની ચંદ્રની સપાટી પર સુરક્ષિત રીતે ઉતરાણ કરવાની અને નમૂનાઓ એકત્રિત કરવાની ક્ષમતા દર્શાવવાનો છે. ઈસરો તેને જૂનમાં લોન્ચ કરવાની યોજના બનાવી રહ્યું છે. ચંદ્રયાન-3ને આંધ્રપ્રદેશના શ્રીહરિકોટા સ્થિત સતીશ ધવન સ્પેસ સેન્ટરથી લોન્ચ વ્હીકલ માર્ક-3 (LVM-3) દ્વારા ચંદ્ર તરફ મોકલવામાં આવશે.
