બોલીવુડમાં પોતાના અભિનયથી લોકોના દિલો પર રાજ કર્યા બાદ અભિનેતા શરમન જોશી હવે ગુજરાતી સિનેમામાં પદાર્પણ કરવા માટે તૈયાર છે. આ ઈન્ડસ્ટ્રીમાં તે ગુજરાતી ફિલ્મ ‘અભિનંદન’થી ડેબ્યૂ કરવા જઈ રહ્યો છે. આ ફિલ્મનું એક પોસ્ટર પણ સામે આવ્યું છે, જેમાં શરમન પ્રેગ્નેન્ટ જોવા મળે છે. પોસ્ટરમાં, તેના ટી-શર્ટ પર લખ્યું છે કે પિતૃત્વનું કોઈ લિંગ નથી.
હાલમાં જ એક ઈન્ટરવ્યુ દરમિયાન શરમને આ ફિલ્મ પર ખુલીને વાત કરી હતી. આ વાતચીતમાં તેણે જણાવ્યું કે આ ફિલ્મ ગર્ભવતી પુરુષ પર કરવામાં આવેલા સંશોધન પર આધારિત છે. અભિનેતાએ કહ્યું કે, ફિલ્મની વાર્તા ગર્ભવતી થયા પછી સામનો કરવામાં આવતા પડકારોની આસપાસ વણાયેલી છે. સાથે જ તેણે એમ પણ કહ્યું કે લોકોને ફિલ્મમાં કોમેડી સાથે ઈમોશન પણ જોવા મળશે. જણાવી દઈએ કે થોડા સમય પહેલા રીલિઝ થયેલી રિતેશ દેશમુખની ફિલ્મ મિસ્ટર મમી પણ આ વિષય પર બની હતી. જોકે, શર્મને આ વિશે જણાવ્યું કે તેણે રિતેશની ફિલ્મ જોઈ નથી. ઈન્ટરવ્યુ દરમિયાન શર્મને કહ્યું કે તેને રેહાન ચૌધરી દ્વારા નિર્દેશિત અભિનંદન ફિલ્મથી ઘણી આશા છે અને તે આ ફિલ્મને લઈને ખૂબ જ ઉત્સાહિત પણ છે.
નોંધપાત્ર વાત એ છે કે શરમન જોશી તેની જબરદસ્ત એક્ટિંગ માટે જાણીતો છે. તેણે અત્યાર સુધી ઘણી ફિલ્મોમાં પોતાના પાત્રથી લોકોના દિલ જીતી લીધા છે. ગોલમાલ, ઢોલ અને 3 ઈડિયટ્સ જેવી ફિલ્મોમાં તેનો અભિનય લોકોને ખૂબ જ પસંદ આવ્યો હતો. વર્ષ 2019માં તે અક્ષય કુમારની સાથે ફિલ્મ મિશન મંગલમાં જોવા મળ્યો હતો. આ ફિલ્મ બોક્સ ઓફિસ પર હિટ સાબિત થઈ હતી.
