તુર્કીની કંપની સેલેબી એરપોર્ટ સર્વિસીસ ઈન્ડિયા પ્રાઈવેટ લિમિટેડે શુક્રવારે “રાષ્ટ્રીય સુરક્ષાના હિતમાં” BCAS દ્વારા તેની સુરક્ષા મંજૂરી રદ કરવાના નિર્ણય સામે દિલ્હી હાઈકોર્ટમાં અરજી કરી હતી. તુર્કીએ પાકિસ્તાનને ટેકો આપ્યો અને પાકિસ્તાન અને પીઓકેમાં આતંકવાદી છાવણીઓ પર ભારતના હુમલાઓની નિંદા કરી તેના થોડા દિવસો બાદ સેલેબીની સુરક્ષા મંજૂરી રદ કરવામાં આવી હતી. પાકિસ્તાને ભારત સાથેના લશ્કરી સંઘર્ષમાં તુર્કી ડ્રોનનો વ્યાપક ઉપયોગ પણ કર્યો છે.
કંપની ભારતમાં 15 વર્ષથી કાર્યરત છે.
આ કેસ સાથે સંકળાયેલા એક વકીલે આ બાબતની પુષ્ટિ કરી છે અને અરજી આવતા અઠવાડિયે સૂચિબદ્ધ થવાની શક્યતા છે. સેલેબી 15 વર્ષથી વધુ સમયથી ભારતીય ઉડ્ડયન ક્ષેત્રમાં કાર્યરત છે અને 10,000 થી વધુ લોકોને રોજગારી આપે છે. તે 9 એરપોર્ટ પર તેની સેવાઓ પૂરી પાડે છે. “રાષ્ટ્રીય સુરક્ષાના હિતમાં, સેલેબી એરપોર્ટ સર્વિસીસ ઈન્ડિયા પ્રાઇવેટ લિમિટેડના સંદર્ભમાં સુરક્ષા મંજૂરી તાત્કાલિક અસરથી રદ કરવામાં આવે છે,” બ્યુરો ઓફ સિવિલ એવિએશન સિક્યુરિટી (BCAS) એ એક આદેશમાં જણાવ્યું હતું. તુર્કીના સેલેબીના એકમ, આ કંપનીને નવેમ્બર, 2022 માં સુરક્ષા મંજૂરી આપવામાં આવી હતી. સેલેબીની વેબસાઇટ અનુસાર, તે ભારતમાં વાર્ષિક લગભગ 58,000 ફ્લાઇટ્સ અને 5,40,00 ટન કાર્ગોનું સંચાલન કરે છે.
સેલેબી દિલ્હી અને મુંબઈ સહિત આ મુખ્ય એરપોર્ટ પર સેવાઓ પૂરી પાડે છે
તુર્કીની આ કંપની મુંબઈ, દિલ્હી, કોચીન, કન્નુર, બેંગલુરુ, હૈદરાબાદ, ગોવા, અમદાવાદ અને ચેન્નાઈ એરપોર્ટ પર સેવાઓ પૂરી પાડે છે. અગાઉ એક નિવેદનમાં, સેલેબી એવિએશન ઇન્ડિયાએ જણાવ્યું હતું કે તે ભારતીય ઉડ્ડયન, રાષ્ટ્રીય સુરક્ષા અને કર નિયમોનું સંપૂર્ણપણે પાલન કરે છે અને સંપૂર્ણ પારદર્શિતા સાથે કાર્ય કરે છે. તેણે ભારતમાં કંપનીની માલિકી અને કામગીરી અંગેના તમામ આરોપોને નકારી કાઢ્યા અને દેશના ઉડ્ડયન ક્ષેત્ર પ્રત્યેની તેની લાંબા ગાળાની પ્રતિબદ્ધતાને પુનઃપુષ્ટિ કરી.
DIAL એ પણ કરાર સમાપ્ત કર્યો
દિલ્હી એરપોર્ટ ઓપરેટર DIAL એ પણ કહ્યું હતું કે તેણે ઇન્દિરા ગાંધી ઇન્ટરનેશનલ એરપોર્ટ (IGAI) પર ગ્રાઉન્ડ મેન્ટેનન્સ અને કાર્ગો હેન્ડલિંગ માટે જવાબદાર સેલેબીના યુનિટ્સ સાથેના કરારને ઔપચારિક રીતે સમાપ્ત કરી દીધો છે. સેલેબી એરપોર્ટ સર્વિસીસ ઈન્ડિયા પ્રાઈવેટ લિમિટેડ અને સેલેબી દિલ્હી કાર્ગો ટર્મિનલ મેનેજમેન્ટ ઈન્ડિયા પ્રાઈવેટ લિમિટેડ અનુક્રમે ગ્રાઉન્ડ મેન્ટેનન્સ અને કાર્ગો હેન્ડલિંગ કામગીરીનું ધ્યાન રાખતા હતા.