5 ગોલાના ધંધાર્થી પાસેથી 83 કિલો વાસી માવા રબડી મળી
બિન આરોગ્યપ્રદ રબડીનો નાશ કરવામાં આવ્યો
ખાણીપીણીના 20 ધંધાર્થીને ત્યાં ચેકિંગ કરાયું
રાજકોટમાં આઝાદ હિન્દ, રામ ઔર શ્યામ સહિત 5 ગોલાના ધંધાર્થી પાસેથી 83 કિલો વાસી માવા રબડી મળી આવી હતી. ઉનાળાની ઋતુ દરમિયાન આઇસગોલાનો ખાદ્યચીજ તરીકે વ્યાપક પ્રમાણમાં ઉપયોગ થાય છે. જેને અનુલક્ષીને રાજકોટ મહાનગરપાલિકાના ફૂડ વિભાગ દ્વારા રાજકોટ ખાતે આવેલ આઇસગોલાનું વેચાણ કરતી 5 પેઢીમાં તપાસ દરમિયાન બિન આરોગ્યપ્રદ સ્થિતિમાં સંગ્રહ કરેલા માવા અને કસ્ટર્ડ પાઉડર મિશ્રિત રબડીનો 83 કિલો જથ્થો નાશ કરવામાં આવ્યો હતો. રાજકોટ મહાનગરપાલિકાના ફૂડ વિભાગ દ્વારા ફૂડ સેફ્ટી ઓન વ્હીલ્સ વાન સાથે મોરબી રોડ, સેટેલાઈટ ચોક વિસ્તારમાં ચકાસણી હાથ ધરવામાં આવી હતી.
જેમાં 20 ફૂડ બિઝનેસ ઓપરેટર દ્વારા વેચાણ થતાં ઠંડાપીણાં, આઇસ્ક્રીમ, પ્રિપર્ડ ફૂડ તથા ઉપયોગમાં લેવાતા ખાદ્ય તેલ વગેરેના 26 નમૂનાની સ્થળ પર ચકાસણી કરવામાં આવી હતી. જેમાં 10 પેઢીને લાયસન્સ અંગે નોટિસ આપી હતી. તેમજ પેડક રોડ પર રવિરાજ રેફ્રીજરેશનમાંથી વિમલ બ્રાન્ડ કાજુ ગુલકંદ આઇસ્ક્રીમનું 100 ML પેકેટનો નમૂનો લેવામાં આવ્યો હતો.