ગોંડલ યાર્ડે 23.61 કરોડની આવક કરી રાજયમાં પ્રથમ આવી
દાયકાઓથી પ્રથમ રહેતી ઊંઝા યાર્ડ બીજા નંબરે ધકેલાઇ
રાજકોટ યાર્ડ 21.98 કરોડની આવક સાથે ત્રીજા નંબરે
સૌરાષ્ટ્રના અગ્રીમ ગણાતા ગોંડલ માર્કેટિંગ યાર્ડે નાણાકીય વર્ષ 21- 22માં રૂ.23.61 કરોડની જંગી આવક કરી રાજ્યમાં પ્રથમ નંબર મેળવી ડંકો વગાડ્યો છે. દાયકાઓથી પ્રથમ નંબરે રહેતા ઊંઝા યાર્ડને ગોંડલ યાર્ડે બીજા નંબરે ધકેલી દીધું છે. આગામી વર્ષોમાં ગોંડલ માર્કેટિંગ યાર્ડની આવકને દેશના પ્રથમ નંબરે લઈ જવા ચેરમેન દ્વારા સપનું સેવવામાં આવ્યું છે.
ગોંડલ માર્કેટીંગ યાર્ડના ચેરમેન અલ્પેશ ઢોલરીયાએ જણાવ્યું હતું કે, તાજેતરમાં ગુજરાત નિયંત્રણ બજાર સંઘ અમદાવાદ દ્વારા વર્ષ 2021-22નાં નાણાકીય વર્ષનો અહેવાલ રજૂ કરવામાં આવ્યો હતો, આ અહેવાલ પ્રમાણે ગોંડલ માર્કેટિંગ યાર્ડની આવક રૂ. 23.61 કરોડ થતા સમગ્ર રાજ્યના માર્કેટિંગ યાર્ડની આવકમાં પ્રથમ નંબર મેળવ્યો છે. સાથોસાથ ગોંડલ માર્કેટિંગ યાર્ડે 15.31 કરોડની બચત કરી છે. યાર્ડનું ભંડોળ રૂ. 79.32 કરોડ થયું છે, જ્યારે દાયકાઓથી પ્રથમ રહેતું ઊંઝા માર્કેટિંગ યાર્ડની આવક 23.29 કરોડ થતા તે બીજા નંબરના સ્થાને ધકેલાયું છે. જ્યારે રાજકોટ માર્કેટિંગ યાર્ડ 21.98 કરોડ સાથે ત્રીજા નંબરે અને સુરત 17.99 કરોડ સાથે ચોથા નંબરે પહોંચ્યું છે.
સૌરાષ્ટ્રના અગ્રીમમાંથી ગુજરાતના અગ્રીમ નંબરે પહોંચેલા ગોંડલ માર્કેટિંગ યાર્ડની આવક અંગે ચેરમેન અલ્પેશ ઢોલરીયાએ જણાવ્યું હતું કે, માર્કેટિંગ યાર્ડમાં ચણાની આવક અને વેચાણનો મહત્વનો ફાળો રહ્યો છે. ચણાની સીઝનમાં રોજ આશરે 35,000 બોરીનું વેચાણ થઈ રહ્યું હતું. જેની સામે લસણ અને ડુંગળીના ભાવ નીચા રહ્યા હતા. જો ડુંગળી અને લસણના ભાવ થોડા વધારે હોત તો હજી વધુ પાંચ કરોડની આવક વધી થઇ હોત. ઉલ્લેખનીય છે કે, રાજ્ય સરકાર દ્વારા લસણ અને ડુંગળીમાં સહાય કરવામાં આવી હતી. આથી ખેડૂતોને રાહત મળી હતી.
ગોંડલ માર્કેટિંગ યાર્ડમાં વિવિધ જણસીની ખરીદી માટે દેશભરમાંથી વેપારીઓ વર્ષ દરમિયાન આવતા હોય છે. જેમાં રાજસ્થાન, પંજાબ, મહારાષ્ટ્ર, તમિલનાડુનાં વેપારીઓ ખાસ કરીને મરચા, લસણ, ડુંગળીની ખરીદી માટે આવતા હોય છે. જ્યારે મગફળી અને ધાણાની ગુજરાતના વેપારીઓ ખરીદી કરી લેતા હોય છે અને તેઓ દ્વારા દેશ-વિદેશમાં નિકાસ કરવામાં આવતી હોય છે.