ઓડિશાના ખુર્દા જિલ્લામાં EVMમાં તોડફોડ કરવા બદલ ભાજપના ઉમેદવારની ધરપકડ કરવામાં આવી છે. વાસ્તવમાં, મશીનમાં ખરાબીના કારણે, તેમણે પોતાનો મત આપવા માટે લાંબા સમય સુધી લાઇનમાં રાહ જોવી પડી. ચિલિકાથી ભાજપના ધારાસભ્ય પ્રશાંત જગદેવ આ વખતે ખુર્દાથી ચૂંટણી લડી રહ્યા છે. તમને જણાવી દઈએ કે શનિવારે છઠ્ઠા તબક્કાના મતદાન દરમિયાન આ ઘટના બની હતી.
ભાજપના નેતા પ્રશાંત જગદેવ તેમની પત્ની સાથે મતદાન કરવા ગયા હતા. મતદાન મથક પર ઈવીએમમાં ખરાબીના કારણે તેમને લાંબો સમય રાહ જોવી પડી હતી. આ દરમિયાન તેમની અને ત્યાં હાજર અધિકારીઓ વચ્ચે બોલાચાલી થઈ અને ગુસ્સામાં તેણે ટેબલ પર રાખેલા ઈવીએમને ધક્કો માર્યો, જેના કારણે તે પડી ગયું અને તૂટી ગયું. પોલીસ અધિક્ષક (SP) અવિનાશ કુમારે કહ્યું કે અધિકારીઓની ફરિયાદના આધારે ધારાસભ્યની ધરપકડ કરવામાં આવી છે.
ભાજપના નેતા ન્યાયિક કસ્ટડીમાં
ધરપકડ બાદ બીજેપી નેતાને કોર્ટમાં રજૂ કરવામાં આવ્યો હતો, જ્યાંથી તેને જ્યુડિશિયલ કસ્ટડીમાં મોકલી દેવામાં આવ્યો છે. હાલ તે ખુર્દા જેલમાં બંધ છે. જગદેવ વિરુદ્ધ આઈપીસીની વિવિધ કલમો ઉપરાંત રિપ્રેઝન્ટેશન ઓફ ધ પીપલ એક્ટ હેઠળ કેસ નોંધવામાં આવ્યો હતો. તેમની ફરિયાદમાં, અધિકારીઓએ ભાજપના નેતા પર મતદાન કેન્દ્ર પર હંગામો મચાવવા, પ્રક્રિયામાં અવરોધ અને અધિકારીઓ સાથે ગેરવર્તન કરવાનો આરોપ મૂક્યો છે.
એસપીએ કહ્યું, “અમે જિલ્લા ચૂંટણી અધિકારી (DEO)ને ઘટનાના CCTV ફૂટેજની તપાસ કરવા વિનંતી કરી છે.” બીજેપીના અન્ય એક નેતાએ દાવો કર્યો હતો કે તેમની સામેના આરોપો રાજકીય રીતે પ્રેરિત છે. તેમણે કહ્યું, “મતદાન કેન્દ્ર પર હાજર અધિકારી તમામ મતદારો સાથે ગેરવર્તન કરી રહ્યો હતો, તેણે પ્રશાંત જગદેવ સાથે પણ આવું જ કર્યું.” રાજ્યના શાસક પક્ષ બીજેડીએ પણ મુખ્ય ચૂંટણી અધિકારી (CEO)ને ફરિયાદ દાખલ કરીને જગદેવ સામે કડક કાર્યવાહીની માંગ કરી હતી.